Mir hen e paar strengi Täg hinter uns. Nachdem am Samstig dr Zügeltag guet über d Bühni isch und mir unseri Wohnig mit eme lachende und hüllende Aug abgeh hend (mir freue uns, könne eusi Nochmieter hoffentlich viel Freud dra ha), hets gheisse: packe!
Nachdem mir e klassischi Uslegeordnig gmacht hend und unseri über 200 Ziile langi Excelltabelle zum gfühlt 100x abghöcklet hend, het denn würkli nüt meh gfehlt. Das hoffe, mir zumindest füre Afang. Meh glaubts kum, wenn meh d Föteli gseht, aber es het au tatsächlich alles in 2 Köffer (Ikeatäsche werde dr neusti Trends als Kofferersatz) und unserem Handgepäck Platz gha.
Nebe all unserem Material hen natürlich au d Velos guet und möglichst sicher müesse verpackt werde. Nach guete 3 Stund und 25 Meter Bubblewrap hen mir sie verpackt und parat gha.
Nebem viele Packe hen mir au vo ganz vielne Lüüt müesse Abschied neh. Es isch so schön gsi euch nomol zgseh.
Hüt Obe werde mir vo Priska, Markus, Simon klei, Daria und Koch, an Flughafe gfahre und übernachte bim Simon sinere Tante in dr Nöchi vom Flughafe. Morn morge frühe gohts Abentüür denn los via Frankfurt nach Anchorage, Alaska.
Mir freue uns uf das grosse Abentüür. Mir nehme euch do gern chli mit und natürlich freue mir uns au immer über persönlichi Nochrichte und Neuigkeite us dr Schwiiz!
Bis bald, Tamara und Simon
Gueti Reis♥️
Uf bald, basset uf euch uf❤️